t Evengelie volgens Matteüs 13
01Op dij dag ging Jezus tou t hoes oet en ging aan t meer zitten.
02Der kwam zo'n koppel volk om hom toustoan dat e in n boot stapte. Doar ging e in zitten en aal t volk bleef op kaant van waal stoan.
03Hai vertelde heur veul en bruukte doarbie geliekenizzen: "Der was ais n boer dij ging aan t zaaien.
04Bie t zaaien vuil n dail bie t pad langs. Dou kwammen der vogels aan en dij pikten t op.
05n Aander paart kwam in staingrond te laande. Doar lag mor n beetje eer. t Zoad kwam al gaauw op: t lag ja nait daip.
06Mor dou zun opkommen was, verschruide en verdreugde t, omreden t haar ja gain worrels zet.
07Weer n aander dail vuil maank stiekels. Dij kwammen tougelieks op en smoorden t zoad.
08Weer n aander dail vuil in goie grond. Dou dat opkommen was, smeet t honderd, sesteg of dattegmoal zoveul op.
09Wèl oren het, mout ter ook mit lustern!"
10 Leerlingen kwammen Jezus vroagen: "Woarom bruuk ie geliekenizzen as ie mensken toutoalen?"
11 Hai antwoordde heur: "Joe is t gund gehaaimen van God zien riek te kennen, mor heur nait.
12 Wèl ja wat het, krigt nog tou, zodat e meer as zat het. Mor wèl niks of naks het, dij zel ook nog ofpakt worden wat of e het.
13 Doarom bruuk ik geliekenizzen as ik heur toutoal. Hou of zai ook kieken, ze zain ja niks. En hou of zai ook lustern, ze begriepen nait.
14 Zo wordt woarhaid wat of Jesaja profetaaierd het:
'Luster zo goud as ie kinnen,
verstoan zel ie nait.
Kiek zo schaarp as ie willen,
zain zel ie nait.
15 t Haart van dit volk is verstaind,
mit heur oren willen ze mor naauw heuren
en heur ogen hebben ze dichtknepen.
Aans zollen ze ja zain mit heur ogen
en heuren mit heur oren,
ze zollen inzicht kriegen,
tou inkeer kommen
en deur mie beter moakt worden.'
16 Mor wat heb ie n gelok dat ie mit joen ogen zain en mit joen oren heuren.
17 Ik zeg joe: veul profeten en rechtveerdege lu haren geern zain wild wat of ie zain, mor ze kregen t nait te zain. Ze haren geern heuren wild wat of ie heuren, mor ze hebben t nait te heuren kregen.
18 Luster nou goud wat of geliekenis van zaaier maint.
19 Ain dij bosschop van t keunenkriek heurt zunder hom te begriepen, liekt op t zoad dat bie t pad langs streud is. Den komt duvel en pikt vot wat in zien haart oetzaaid is.
20 t Zoad dat op staingrond te laande kwam, slagt op ain dij bosschop heurt en hom votdoalek mit bliedschop aannemt.
21 Mor t het bie hom nait daip worrel schoten. t Is n mensk van n ogenslag. As e in verdrokken komt of achternoazeten wordt, vaalt e votdoalek weer òf.
22 t Zoad dat maank stiekels zaaid is doar wordt ain mit bedould dij t woord wel heurt, mor wereld mit zien zörg, en riekdom mit zien bekukelderij, smoren bosschop. Hai dragt gain vrucht.
23 t Zoad dat in goie grond terechtkomt, slagt op dijent dij bosschop heuren en onder t verstand kriegen. Dij droagen ook vruchten: d'ain honderd-, d'aander sesteg- en weer n aander dattegmoal zoveul."
24 Jezus vertelde heur nog n aander geliekenis: "t Is mit t hemels keunenkriek krekt as mit n boer dij goud zoad zaaid haar op zien laand.
25 Mor in tied dat elkenain slaip, kwam zien vijand en zaaide roet maank t koorn en verswon weer.
26 Dou t koorn opkwam en vrucht zetten dee, kwam t roet ook veurndag.
27 Boer zien aarbaiders kwammen bie hom en vruigen: 'Boas, heb ie wel goud zoad op joen laand zaaid? Woar komt aans aal dat roet vandoan?'
28 Hai zee tegen heur: 'Dat het n vijand doan!' Aarbaiders zeden: 'Zel wie t ter den mor oetroppen en bie nkander pakken?'
29 'Nee, nait doun!' zee e. 'As ie t roet ter oetroppen, trek ie tougelieks koorn der ook mit oet.
30 Loat t mor mit zien baaident opgruien tou tied van maaien en mennen. Den zel ik tegen zichters zeggen: 'Pak eerst t roet bie nkander. Moak ter mor bozzen van om te verbranden. Mor sloag waait in schuur op.''"
31 Hai vertelde heur nog n geliekenis: "t Hemels keunenkriek liekt op n mosterdzoadje dat ain in zien toen zaaide.
32 t Mag t lutjeste wezen van ale zoad, mor as t ainmoal oetgruid is, is t groder as stroeken en t wordt n boom. Vogels kinnen in zien takken nuzzeln."
33 Nog n aander geliekenis vertelde hai heur: "God zien riek is krekt as zoerdaig. n Vraauw pakt ter wat van en dut dat in drij kop waaitenmeel, net zo laank tot t meel haildaal rezen is."
34 Dat aal vertelde Jezus aan t volk in geliekenizzen. Der zunder vertelde hai heur niks.
35 Zo wer woarhaid wat of profeet zegd het: "Ik zel spreken in geliekenizzen; ik zel kundeg moaken wat of bezied zat sunt t begun van wereld òf."
36 Dou stuurde Jezus t volk vot en ging noar hoes tou. Leerlingen kwammen bie hom en vruigen: "Leg ons nou ais oet wat of ie bedoulen mit dat roet op t laand."
37 Hai ging der as volgt op in: "Man dij t goie zoad oetzaaide is Menskenzeun.
38 t Baauwlaand is wereld, t goie zoad dat binnen kinder dij bie t keunenkriek heuren. t Roet dat binnen kinder dij bie duvel heuren.
39 Vijand dij t zaaid het, is duvel. t Maaien en mennen is t leste bedrief van t wereldspul. Zichters binnen engels.
40 Krekt zo as t roet bie nkander haarkt wordt en in brand stoken, zo zel t ter heergoan in t èn van wereld.
41 Menskenzeun zel zien engels der op oetsturen en ze zellen oet zien keunenkriek aal bie nkander brengen wat tou kwoad aanzet en aal dij kwoad doun!
42 Engels zellen heur in luchtende ovent smieten. Doar zellen ze jammern en mit tanden knaarzen!
43 Mor rechtveerdege lu zellen stroalen as zun in heur Voader zien riek. Wèl oren het, mout ter ook mit lustern!
44 t Hemels keunenkriek is as n schat dij in grond zit. Ain von hom en stopte hom bezied. Hai was zo blied dat e aal wat of e haar verkochde. En mit dat geld kochde hai t stok laand.
45 t Gaait mit t hemels keunenkriek krekt as mit n kiepkerel dij oet is op mooie peerls.
46 Op n goie dag zugt hai n haile kostboare. Den verkochde hai ales wat e haar om dij peerl te kopen.
47 t Is mit t hemels keunenkriek krekt as mit n sleepnet. Dij is in zee deelloaten en hai brengt hakkemak en nikkenak bie nkander.
48 As e vol is, trekken ze hom op kaant van waal. Ze goan der bie zitten, doun goien bie nkander in körven en t minne goud smieten ze vot.
49 Zo zel t ter omweg goan bie t èn van tied. Engels zellen der op oettrekken en hoalen minnen maank goien vandoan.
50 Ze zellen ze in luchtende ovent smieten. Doar zel n jammern en tandenknaarzen wezen van wonder en geweld.
51 Heb ie dit altmoal begrepen?" vruig Jezus. "Joa wis!" zeden ze.
52 Hai zee tegen heur: "Doarom liekt elke schriftgeleerde dij grepen is deur t hemels keunenkriek op n hoesvoader dij oet zien veurroad nij en old veurndag hoalt."
53 Dou Jezus dizze geliekenizzen altmoal verteld haar, ging e doarvandoan.
54 Hai ging noar stad tou doar zien volk woonde. Doar gaf e onderwies in heur sinagoge. Hai leerde heur zo dat lu van verboazen zeden: "Woar het e dij wieshaid en dij kracht heer?
55 Dit is toch ain van timmerman? Zien moeke is Maria toch? En Jakobus, Jozef, Simon en Juda binnen zien bruiers toch?
56 Zien zusters wonen toch altmoal bie ons? Woar het e dat den aal heer?"
57 Ze aargerden zok aan hom. Mor Jezus zee tegen heur: "n Profeet is naargens minder in reken as in zien aigen stad en bie zien aigen volk."
58 Doar het e den ook nait veul machtege doaden oetricht vanwege heur gebrek aan vertraauw.
|
